Yerusəlimin rus kitabxanasında azərbaycanlı rejissor Rüfət Əsədovla görüş keçirilib. Görüşdə Təl Əviv Dağ Yəhudiləri Cəmiyyətinin rəhbəri ravvin Şmuel Simantov, “AZİZ” İsrail-Azərbaycan Beynəlxalq Assosiasiyasının üzvləri, Yerusəlimin dağ yəhudilərinin tarixi və mədəniyyəti üzrə mütəxəssislər iştirak ediblər.

Görüşdə soydaşımızın dağ yəhudiləri haqqında çəkdiyi bir sıra filmlər, o cümlədən "Quba yəhudiləri",  "Əgər səni unutsam, Yerusəlim", "Kənddə sonuncu yəhudi", "Ananın duası" və "Mənim dostum Meir" filmləri müzakirə edilib. Sonra rejissorun yeni ekran əsəri olan "Ananın duası" filmi göstərilib. Film İsraildə yaşayan və dağ yəhudiləri sinaqoqu "Or-Ovadya"nın yaradıcısı ravvin Şmuel Simantovla, anası Batiya Simantovanın həyat və fəaliyyətindən bəhs edir.

Tədbirin bədii hissəsində musiqiçi Elxanan Axaronun ifasında Azərbaycan mahnıları səsləndirilib.

Sonda “Azİz” İsrail-Azərbaycan Beynəlxalq Assosiasiyasının icraçı direktoru Şaul Siman-Tov və Rüfət Əsədov yüksək səviyyəli görüşün keçirilməsinə görə tədbirin təşkilatçılarına minnətdarlığını, iştirakçılara isə təşəkkürünü bildirib.

Qeyd edək ki, Rüfət Əsədov San Fransisko, Zaqreb, Strasburq, Münhen, Nyu-York, Moskva, Çikaqo, Los Anceles, London, Helsinki və digər şəhərlərdə keçirilən bir sıra beynəlxalq kino festivallarının iştirakçısıdır. O, ümumilikdə 60-dan çox sənədli və bədii filmin ərsəyə gəlməsində yaxından iştirak edib.