Almaniyada yaşayan azərbaycanlı həkim, Köln Universiteti Klinikasının şöbə müdiri, tibb elmləri doktoru Nuran Abdullayev “minimal-invaziv neyroradioloq mütəxəssis” diplomunu almaqla daha bir uğura nail olub.

Bu barədə məlumat verən Nuran Abdullayev bildirib ki, bu mühüm hadisə Almaniyanın İnvaziv Radiologiya və Minimal-İnvaziv Terapiya Cəmiyyəti, eləcə də Almaniyanın Neyroradiologiya və Rentgen cəmiyyətləri tərəfindən ayrı-ayrılıqda aparılan qiymətləndirmə və təsdiqetmə prosesindən sonra baş verib.

O qeyd edib ki, bu, Almaniyada invaziv neyroradiologiya sahəsində ən son dərəcəli – II kvalifikasiya səviyyəsidir. Bu kvalifikasiya səviyyəsinə yiyələnmək üçün Almaniyada cəmi 161 mərkəz var. Onlardan biri olan Köln Universitet Klinikasının neyroradiologiya departamenti ilk beşlikdə yer alır, Nordrayn-Vestfalen ərazisində isə ilk yeri tutur.

N.Abdullayev nəzərə çatdırıb ki, Almaniyada bu kvalifikasiya səviyyəsini qazanmış 300-ə yaxın yüksək ixtisaslaşmış neyroradioloq var. Bu həkimlər il ərzində Almaniyada baş verən 270 000 beyin insultu zamanı tələb olunan beyin əməliyyatlarına, eləcə də 83 milyonluq əhalinin 5 faizində rast gəlinən beyin anevrizmalarının neyroradioloji müalicəsinə cavabdehlik daşıyırlar.

Qeyd edək ki, Almaniya-Azərbaycan Radioloji və Neyroradioloji Cəmiyyətinin sədri Nuran Abdullayev həm də aktiv diaspor fəaliyyəti ilə məşğul olur. O, Almaniya Azərbaycanlıları Alyansının İdarə Heyətinin sədridir.