Rustavi Təhsil və Mədəniyyət Mərkəzində 8 Noyabr – Zəfər Günü münasibətilə bayram tədbiri keçirilib.

Şəhər ictimaiyyətinin və Rustavi Təhsil və Mədəniyyət Mərkəzində təhsil alan şagirdlərin iştirakı ilə keçirilən tədbir Gürcüstan və Azərbaycanın Dövlət himnlərinin səsləndirilməsi, şəhidlərin əziz xatirəsinin bir dəqiqəlik sükutla yad olunması ilə başlayıb.

Mərkəzin direktoru Raida Dərziyeva, şairə Güllü Tomarlı, şair-publisist Rafiq Hümmət, “ERA” teatrının rəhbəri Anar Rafiqoğlu, Qaratəhlə ictimai məktəbinin direktoru Bəhram İsayev, müəllimə Mədinə Həsənova, ictimai fəal Vəfa Bayramova çıxışında Azərbaycanın öz ərazi bütövlüyünün bərpası uğrunda apardığı Vətən müharibəsində qazandığı şanlı qələbə barədə fikir və təəssüratlarını ifadə edib.

Tədbirin bədii hissəsində Mərkəzin şagirdləri mahnılar və şeirlər səsləndiriblər. Şairə Güllü Tomarlı Mərkəzin nəzdində yaradılmış kitabxanaya öz kitablarını bağışlayıb. Bu əlamətdar gündən xatirə kimi iştirakçılara “Xarı bülbül” döş nişanları hədiyyə olunub.

Rustavi Təhsil və Mədəniyyət Mərkəzi cari ilin fevral ayında yaranıb. Mərkəzdə soydaşlarımızın inteqrasiyası, eləcə də, milli mədəniyyətimizin qorunub saxlanması istiqamətində bir çox layihələr həyata keçirilir. Diasporla İş üzrə Dövlət Komitəsinin layihələri çərçivəsində Mərkəzdə ödənişsiz dil kursları fəaliyyət göstərir.