ABŞ-nin Corciya ştatında təhsil alan azərbaycanlı gənclər 8 Noyabr – Zəfər Gününü və 9 Noyabr – Dövlət Bayrağı Gününü qeyd edib.

Azərbaycan bayrağı ilə örtülü maşınlar şəhərin mərkəzi küçələri və universitetlərin ətrafında hərəkət edərək yerli cəmiyyətin diqqətini çəkib. Daha sonra gənclər bir araya toplaşaraq milli rəqslərimizi nümayiş edib, Zəfər sevincini bölüşüb.

Qeyd edək ki, Azərbaycanlı Tələbə Təşkilatı 2022-ci ildə Corciya Dövlət Universitetinin tələbəsi Sabrina Babayeva tərəfindən yaradılıb. Corciya Dövlət Universiteti, Corciya Texnologiya İnstitutu və Emori Universiteti kimi müxtəlif təhsil ocaqlarının bakalavr, magistr və fəlsəfə doktoru tələbələrindən ibarətdir. Təşkilatın hal-hazırda 35 üzvü var. Azərbaycanlı tələbələrlə yanaşı türk, türkmən və digər türkdilli xalqların gənc nümayəndələri də buraya üzvdür. Təşkilat hər il Azərbaycanın əlamətdar günləri, mədəniyyətin təbliği ilə bağlı universitet daxilində və kənarda müxtəlif tədbirlər təşkil edir.