ABŞ-nin Florida ştatının Mayami şəhərində müxtəlif xalqların mədəniyyətlərini nümayiş etdirdiyi ənənəvi Mədəniyyət Festivalı keçirilib. Festivalda ölkəmizi  Azərbaycan-Amerika Mədəniyyət Assosiasiyası və Azərbaycan-Amerika Gənclər Assosiasiyasının nümayəndələri təmsil edib.

Ölkəmizə ayrılmış guşədə bayrağımız, milli ornamentli suvenirlər, milli geyimlər, Azərbaycanın tarixindən, milli yeməklərdən, musiqi alətlərindən bəhs edən kitablar, həmçinin xına sənəti nümayiş olunub.

Milli geyimlərdə olan gənclər qonaqları maraqlandıran sualları cavablandırıb, Azərbaycan və onun tarixi, mədəniyyəti haqqında geniş məlumat veriblər.

Azərbaycan mədəniyyəti festival iştirakçılarının böyük marağına səbəb olub. Hətta Mayami-Deyd dairəsinin meri Daniella Levin Kava Azərbaycan guşəsini çox bəyəndiyini, ölkəmizin yüksək səviyyədə təmsil olunduğunu qeyd edib. Mer, eyni zamanda, Amerika-Azərbaycan Tələbə Təşkilatının rəhbəri Nabat Eminovaya və Azərbaycan-Amerika Mədəniyyət Assosiasiyasının rəhbəri Töhfə Eminovaya “Təşəkkürnamə” təqdim edib.