Gürcüstanda fəaliyyət göstərən Qardabani Təhsil və İnteqrasiya Mərkəzində Qarayazı elinin şairi İsa İsmayılzadəyə həsr olunmuş "Gözləyin, dünyaya qayıtmağım var" adlı açıq dərs keçirilib.

Azərbaycan dili və ədəbiyyat müəllimi Sevda Sahverdiyevanın keçdiyi dərsdə şairin həyat və yaradıcılığı haqqında məlumat verilib. Bildirilib ki, şair, tərcüməçi və publisist İsa İsmayılzadə Gürcüstanın Qarayazı (indiki Qardabani) rayonunda anadan olub. Qardabanidə orta məktəbdə müəllim, Azərbaycan Dövlət Televiziya və Radio Verilişləri Komitəsində redaktor, Azərbaycan Sovet Ensiklopediyasında elmi redaktor, “Ədəbiyyat və incəsənət” qəzetində baş redaktorun müavini, “Ulduz” jurnalında şöbə müdiri, “Azərbaycan” jurnalında baş redaktorun müavini, eyni zamanda Azərbaycan Televiziya və Radio Verilişləri Şirkətinin musiqili veriliş baş redaksiyasında musiqi mətnləri şöbəsinin müdiri vəzifələrində işləyib.

Mərkəzin şagirdləri İsa İsmayılzadənin şeirlərini səsləndirdikdən sonra onun haqqında film izləyiblər.