Azərbaycan Respublikasının Prezidenti cənab İlham Əliyevin “Məhəmməd Əmin Rəsulzadənin 140 illiyinin qeyd edilməsi haqqında” Sərəncamının icrası məqsədilə, Azərbaycan Respublikasının Diasporla İş üzrə Dövlət Komitəsinin, Türkiyə-Azərbaycan Dərnəkləri Federasiyasının (TADEF), İstanbul Universitetinin və “Məhəmməd Əmin Rəsulzadə Ev-Muzeyi İctimai Qrupu”nun birgə təşkilatçılığı ilə İstanbul Universitetinin Ədəbiyyat Fakültəsinin konfrans salonunda “Məhəmməd Əmin Rəsulzadə və Türk dünyası” mövzusunda konfrans keçirilib.

Tədbir Azərbaycan və Türkiyənin dövlət himnlərinin səsləndirilməsi və şəhidlərin əziz xatirəsinin yad edilməsilə başlayıb.

Açılış mərasimində Milli Məclisin deputatı, Mədəniyyət Komitəsinin sədri Fazil Mustafa, Türkiyə Böyük Millət Məclisinin üzvü, Türkiyə-Azərbaycan Parlamentlərarası Dostluq Qrupunun rəhbəri Şamil Ayrım, Azərbaycan Respublikasının İstanbul şəhərindəki Baş Konsulluğunun konsulu Zaur Allahverdizadə, Diasporla İş üzrə Dövlət Komitəsinin əməkdaşı Cavid İsmayıl, əməkdar elm xadimi, professor, “Məhəmməd Əmin Rəsulzadə Ev-Muzeyi İctimai Qrupun” rəhbəri Solmaz Rüstəmova-Tohidi, Türkiyə-Azərbaycan Dərnəkləri Federasiyası (TADEF) İdarə Heyətinin sədrinin müşaviri Pərviz Məmmədzadə, Türk Ocaqları İstanbul şöbəsinin rəhbəri Cezmi Bayram, Azərbaycan Türk Ocağının sədri, “Şərq” qəzetinin təsisçisi və baş redaktoru Akif Aşırlı, Türkiyənin Yeditepe Universitetinin professoru İbrahim Yıldırım, tədqiqatçı-jurnalist Dilqəm Əhməd, siyasi təhlilçi Nicat İsmayılbəyli çıxış ediblər.

Natiqlər M.Ə.Rəsulzadənin həyat və fəaliyyətindən, eləcə də istiqlal və azadlıq uğrunda mübarizəsindən danışıb, onun Azərbaycanın ictimai-fikir tarixindəki yeri və rolundan söz açıblar.

Cavid İsmayıl çıxışında Diasporla İş üzrə Dövlət Komitəsinin Xalq Cümhuriyyəti qurucularının xaricdə yaşayan varisləri, yaxın və uzaq qohumları ilə mütəmadi əlaqə saxladığını diqqətə çatdırıb. Bu gün olduğu kimi, bir əsr öncə də Azərbaycanın öz ərazisi daxilində yaşayan bütün millətlərin sərbəst inkişafı üçün geniş imkanlar yaratdığını bildirib.

Konfrans işini TADEF-in Baş Katibi, dosent, İstanbul-Azərbaycan Dostluq Dərnəyinin sədri Xuraman Hülya Ağamirzənin moderatorluğu ilə panel iclasında davam etdirib.

Panel iclasında “Məhəmməd Əmin Rəsulzadə Ev-Muzeyi İctimai Qrupu"nun sifarişi ilə VMF Holdinq tərəfindən M.Ə.Rəsulzadənin 140 illiyi münasibətilə hazırlanmış internet saytı və “M.Ə.Rəsulzadənin Virtual Ev-Muzeyi” layihəsi Vahid Mustafayev tərəfindən tədbir iştirakçılarına təqdim olunub. Eyni zamanda “Türk Xalqları Birliyi” siyasi ideyası və M.Ə.Rəsulzadənin “Türk Dövlətləri Birliyi” Konsepsiyası, “M.Ə.Rəsulzadə və Türk Ocaqları”, “Cümhuriyyət qurucularının və yuxarı təbəqənin bir-biri ilə və mühacir mühiti ilə əlaqələri", “M.Ə.Rəsulzadənin Avropa ölkələrində yaşadığı dövrdə Türkiyə ilə əlaqələri”, “M.Ə.Rəsulzadə və gənclik”, “M.Ə.Rəsulzadənin Rusiya, Qacar və Osmanlı imperiyaları dövründəki fəaliyyəti”, “M.Ə.Rəsulzadənin Türk Ocaqlarındakı fəaliyyəti” mövzularında elmi məruzələr dinlənilib.

Tədbirin sonunda Xalq şairi Zəlimxan Yaqubun M.Ə.Rəsulzadəyə ithafən yazdığı “Kişi” şeirini Xalq artisti, görkəmli xanəndə Alim Qasımovun muğamvari üslubda səsləndirdiyi video nümayiş etdirilib.