Diasporla İş üzrə Dövlət Komitəsinin əməkdaşları Qazaxıstana səfər edib və bir sıra görüşlər keçiriblər.

Paytaxt Astanada fəaliyyət göstərən “Xəzər” Azərbaycan Etnomədəni Birliyinin fəaliyyəti ilə tanış olan əməkdaşlar Qazaxıstandakı Azərbaycan icması və gənc diaspor fəalları ilə görüşüblər.  Azərbaycan diasporunun mütəşəkkil, sistemli və ardıcıl fəaliyyət göstərməsi, eləcə də soydaşlarımızın birlik və həmrəyliyinə nail olunması istiqamətində görülən işlərdən bəhs edilib.  

Sonra Azərbaycanın Qazaxıstandakı fövqəladə və səlahiyyətli səfiri Ağalar Atamoğlanovla görüş baş tutub.

Astana şəhərində fəaliyyət göstərən "Dostluq Evi”ndəki Azərbaycan otağı ilə tanış olan komitə əməkdaşları direktor Nural Aydaşev ilə fikir mübadiləsi aparıblar.

Komitə əməkdaşları Qazaxıstan Milli Avrasiya Universitetinin "Heydər Əliyev auditoriyası"nı ziyarət ediblər. Universitetin Qazaxıstan Xalq Assambleyası kafedrasının müdiri Nataliya Kalaşnikova ilə diaspor fəaliyyəti və bu istiqamətdə təhsilin vacibliyi müzakirə olunub.

Komitənin şöbə müdiri Əli Baytalov görüşlərdə komitənin gördüyü işlər, həyata keçirilən layihələr barədə ətraflı məlumat verib, iki qardaş xalq arasında münasibətlərin inkişafının əhəmiyyətini vurğulayıb.