İsveçin paytaxtı Stokholm şəhərində Naxçıvan Muxtar Respublikasının 100 illik yubileyinə həsr olunmuş tədbir keçirilib.

İsveç-Azərbaycan Mədəniyyət Birliyinin (SAF) təşkilatçılığı ilə baş tutan tədbirdə Azərbaycanın İsveçdəki səfirliyinin əməkdaşları və diaspor nümayəndələri iştirak ediblər.

Tədbirin əvvəlində Azərbaycanın Dövlət Himni səsləndirilib, şəhidlərimizin əziz xatirəsi bir dəqiqəlik sükutla yad edilib.

İsveç-Azərbaycan Mədəniyyət Birliyinin (SAF) sədri Sevda Dadaşova çıxış edərək tədbirin Azərbaycan Respublikasının Prezidenti cənab İlham Əliyevin “Naxçıvan Muxtar Respublikasının 100 illik yubileyinin qeyd edilməsi haqqında” 2023-cü il 30 dekabr tarixli Sərəncamı ilə əlaqədar təşkil olunduğunu bildirib.

Sonra İsveçdə yaşayan azərbaycanlı yazıçı Eluca Atalı Naxçıvanın qədim tarixi və görkəmli şəxsiyyətlərindən danışıb. O qeyd edib ki, Naxçıvan Muxtar Respublikasının yenidən dirçəlişi və inkişafı Ulu Öndər Heydər Əliyevin hakimiyyətə qayıdışından sonra mümkün olub.

Tədbir zamanı isveçli fotoqraf və rejissor Mikael Silkeberq və İsveçdə yaşayan kinorejissor Rahim Sadıqbəyli birgə layihələri olan, Naxçıvanda çəkilmiş “Nuhun izi ilə” adlı sənədli film barəsində məlumat veriblər. Filmin ərsəyə gəlməsində göstərilən dəstəyə görə Diasporla İş üzrə Dövlət Komitəsinə, Azərbaycanın UNESCO üzrə Milli Komissiyasına və Azərbaycanın İsveçdəki Səfirliyinə yaradıcı heyət adından təşəkkür ediblər.

Çıxışlardan sonra tədbir Naxçıvanın səfalı və mənzərələri təbiətini əks etdirən videoçarx nümayiş olunub.

Tədbir türk opera müğənnisi Burcu Kurunun “Laçın” və “Sənə də qalmaz” mahnılarını ifası ilə sona yetib.