Helsinki şəhərində 31 Dekabr – Dünya Azərbaycanlılarının Həmrəyliyi Günü və Yeni il bayramı münasibətilə Finlandiya-Azərbaycan Dostluq Cəmiyyətinin sədri Təranə Nəzərovanın təşkilatçılığı ilə tədbir keçirilib.

Tədbirdə Azərbaycan diasporu, Türkiyə Səfirliyinin nümayəndəsi, fin diplomatlar, o cümlədən Finlandiyanın böyük iş adamları və Helsinki Universitetindən qonaqlar iştirak edib.

Əvvəldə Azərbaycan Respublikasının və Finlandiya Respublikasının Dövlət himnləri səsləndirilib, Azərbaycanın ərazi bütövlüyü uğrunda canlarından keçən şəhidlərimizin və 2024-cü ilin 25 dekabr tarixində baş verən təyyarə qəzası qurbanlarının xatirəsi yad edilib.

Cəmiyyətin sədri Təranə Nəzərova təbrik çıxışında hər iki ölkə arasında dostluq münasibətlərinin inkişafı üçün bu cür tədbirlərin təşkilinin əhəmiyyətini vurğulayıb.  

Daha sonra Dünya Azərbaycanlılarının Həmrəyliyi Gününə həsr olunmuş film göstərilib.

Finlandiyanın tanınmış pianoçusu, Yoensuu Konservatoriyasının fortepiano müəllimi, soydaşımız Kamal Aşurbəylinin ifasında “Sarı gəlin”, “Sənə də qalmaz”, “Azərbaycan” mahnıları zövq oxşayıb.