Kostanayda “Birlik” Etnomədəni Birliyinin yaradılmasının 30 illiyi qeyd olunub.  Azərbaycan Respublikasının Diasporla İş üzrə Dövlət Komitəsinin dəstəyi və "Birlik" Etnomədəni Birliyinin təşkilatçılığı ilə keçirilən tədbir "Dostluq Evi"ndə baş tutub.

Tədbirdə Azərbaycandan gedən nümayəndə heyəti ilə birliyin üzvlərinin görüşü olub. Görüşdə diaspor fəaliyyətinin əhəmiyyətindən və iki xalq arasında körpü rolunu oynamasından bəhs edilib.

Birliyin rəhbəri Rafael Hacıbalayev Qazaxıstan Xalqı Assambleyasının və “Birlik” təşkilatın gördüyü işlərdən bəhs edib. Onlara bu fəaliyyətlərində göstərdiyi dəstəyə görə Diasporla İş üzrə Dövlət Komitəsinə təşəkkürünü bildirib.

Dostluq Evinin direktoru Nataliya Ramazanova Qazaxıstan Xalqı Assambleyasının fəaliyyətindən danışıb, Azərbaycan diasporunun Kostanay şəhərində ən fəal icmalardan biri olduğunu deyib. Daha sonra gənc diaspor nümayəndələri ilə fikir mübadiləsi aparılıb.

Digər çıxışçılar Azərbaycan və Qazaxıstan xalqları arasında mövcud olan dostluq və qardaşlıq münasibətlərinin inkişafında mədəni əlaqələrin mühüm rol oynadığını xüsusi vurğulayıblar.

Tədbir konsert proqram ilə davam edib.