ABŞ-nin Minnesota ştatında yaşayan Azərbaycan əsilli amerikalı atlet Vüsalə Bentli (Bentley) qadınlar arasında plank hərəkətini ən uzun müddət icra etməklə rekorda imza atıb.

İdmançı oktyabrın 24-də Minnesota ştatının Mankato şəhərində keçirilən xeyriyyə tədbirində 5 saat 3 dəqiqə ərzində plank vəziyyətində qalaraq yeni nəticə göstərib. Bununla da o, qadınlar arasında bu idman növü üzrə əvvəlki rekordun yenilənməsinə nail olub.

Vüsalə Bentli bu təşəbbüsü yalnız şəxsi idman uğuru əldə etmək məqsədilə deyil, həm də xeyriyyə məqsədi ilə həyata keçirib. Onun rekord cəhdi nəticəsində yerli xeyriyyə təşkilatına 15 min ABŞ dollarından çox ianə toplanıb.

Soydaşımız yerli mediaya açıqlamasında bildirib ki, təşəbbüsünün əsas məqsədi cəmiyyətə dəstək göstərmək və faydalı bir iş görmək olub. O, əldə etdiyi nəticənin yalnız özünün deyil, tədbirə qoşulan və ianə edən hər kəsin nailiyyəti olduğunu vurğulayıb: “Məqsədim icmamız üçün faydalı bir iş görmək idi. Bu, mənim deyil, sizin və ianə edən hər kəsin tədbiridir”.

Vüsalə Bentli xeyriyyə təşəbbüslərini bundan sonra da davam etdirməyi planlaşdırır. Onun növbəti məqsədi ABŞ-nin 50 ştatının hər birində ən azı bir saat plank hərəkətini yerinə yetirərək müxtəlif xeyriyyə layihələrinə dəstək olmaqdır.

Qeyd edək ki, nəticə hələ “Ginnesin Rekordlar Kitabı” tərəfindən rəsmi təsdiqlənməyib. İdmançı rekordun qeydə alınması üçün müraciət edib. Təsdiqləmə prosesinin bir neçə ay çəkəcəyi gözlənilir.

Soydaşımızın təşəbbüsü həm idman sahəsində əzmkarlığın, həm də ictimai həmrəyliyin və xeyriyyəçilik dəyərlərinin təşviqi baxımından diqqətəlayiq hadisədir. Onun uğuru xaricdə yaşayan azərbaycanlıların müxtəlif sahələrdə qazandıqları nailiyyətlərin və cəmiyyətə fayda verən təşəbbüslərinin növbəti nümunəsidir.

Vüsalə Bentlinin rekord cəhdini əks etdirən video sosial şəbəkələrdə də yayımlanıb. Video ilə aşağıdakı keçid vasitəsilə tanış ola bilərsiniz:

https://www.youtube.com/shorts/pCSaXMR5ZXE