Avstraliya İttifaqının Melburn şəhərində “Viktoriya-Azərbaycan Mədəniyyət Assosiasiyası”nın 10 illik yubileyinə və Novruz bayramına həsr edilmiş tədbir keçirilib.

Tədbirdə Melburn şəhərində yaşayan quzeyli – güneyli azərbaycanlılarla yanaşı, xarici qonaqlar, Azərbaycan Respublikasının Avstraliya İttifaqındakı müvəqqəti işlər vəkili Vaqif Cəfərov, Avstraliyanın Leyboristlər Partiyasının üzvü, millət vəkili Natali Süleyman, Viktoriya Multikulturalizm Komissiyasının komissarı Silvia Komb və başqaları iştirak ediblər.

Çıxışçılar “Viktoriya-Azərbaycan Mədəniyyət Assosiasiyası”nın fəaliyyətindən bəhs edib, ötən 10 ildə soydaşlarımızın təşkilatlanması, Vətənə bağlılıqlarının qorunması, Azərbaycan həqiqətlərinin təbliği üçün gördüyü işləri diqqətə çatdırıblar. Bu cür tədbirlərin Avstraliyadakı Azərbaycan icmasının birliyini möhkəmləndirdiyi, eyni zamanda mədəni irsimizi geniş ictimaiyyətə tanıtmaq üçün gözəl fürsət yaratdığı bildirilib.

Həmçinin, Novruz bayramının Azərbaycan mədəniyyətində, milli irsimizdə oynadığı əhəmiyyətli rol vurğulanıb, bu bayramın əsrlər boyu xalqımızı birləşdirdiyi, həmrəylik və yenilənmə rəmzi olduğu qeyd edilib, Avstraliyada yaşayan azərbaycanlılar üçün milli dəyərlərin qorunmasının və gələcək nəsillərə ötürülməsinin vacibliyi xüsusi vurğulanıb.

Tədbirdə AYTAY musiqi qrupu, Əməkdar artist Sevinc Hüseynli, rəqqaslar Reza Xodayari və Məhsa Qənbəri Azərbaycan musiqisini və milli rəqslərimizi ifa ediblər.