Gürcüstanın paytaxtı Tbilisidə fəaliyyət göstərən “Gürcüstanda yaşayan Azərbaycanlı Məktəbli Gənclər Mərkəzi”nin təşəbbüsü və Diasporla İş üzrə Dövlət Komitəsinin dəstəyi ilə 2023-cü ildən həyata keçirilən “Azərbaycan və gürcü milli rəqslərinin tədrisi” adlı layihə cari ildə də uğurla davam edir.

4 mərhələdən ibarət layihənin 3-cü mərhələsi artıq başa çatıb. Son mərhələ cari ilin sentyabr ayından başlayacaq. Layihənin əvvəlki mərhələlərində Azərbaycan və gürcü rəqslərini mənimsəmiş tələbələr müəllimlərin nəzarəti ilə rəqsləri təşkilatın nəzdindəki rəqs ansamblının azyaşlı iştirakçılarına öyrədiblər.

Mərkəz tərəfindən peşə təhsili çərçivəsində həyata keçirilən layihəyə əsasən Azərbaycan və gürcü rəqsləri Gürcüstanda yaşayan soydaşlarımıza tədris olunur. Layihənin məqsədi Azərbaycan rəqslərinin soydaşlarımızın yaşadığı bölgələrdə təbliğidir.