ABŞ-nin Kolorado ştatında soydaşlarımız Dünya Azərbaycanlıların Həmrəyliyi Gününü və Yeni ili bayram tədbiri ilə qeyd ediblər. Həmin ştatda azərbaycanlıların ilk diaspor təşkilatı olan “Koloradoda Azərbaycan Diasporu”nun keçirdiyi tədbir “Həmrəyliyimiz bir yox, hər gündür!” şüarı altında baş tutub.

“Koloradoda Azərbaycan Diasporu”nun təsisçisi və rəhbəri Nigar Şıxsəfiyeva açılış nitqində təşkilatın fəaliyyəti, gələcək hədəfləri haqqında məlumat verib, Dünya Azərbaycanlılarının Həmrəyliyi Gününün əhəmiyyətindən danışıb.

Bayram tədbirində xaricdə yaşayan soydaşlarımızın vahid milli məfkurə ətrafında sıx birləşməsindən, aktiv diaspor fəaliyyətindən, bu işə verdikləri töhfələrdən söz açılıb. Harada yaşamasından asılı olmayaraq hər bir azərbaycanlı üçün Vətənə bağlılığın mühüm əhəmiyyət kəsb etdiyi, soydaşlarımızın qəlblərinin daim Vətənlə döyündüyü bildirilib.

Tədbir iştirakçıları Azərbaycan diasporunun inkişafı və diaspor quruculuğu istiqamətində dövlətimizin həyata keçirdiyi tədbirlər barədə məlumatlandırılıb.

Sonra intellektual oyunlar təşkil edilib və iştirakçılara hədiyyələr verilib.

Tədbirdə təşkilat üzvlərinə və xarici qonaqlara Vətən müharibəsindəki şanlı zəfərin simvolu kimi "Xarıbülbül" döş nişanları təqdim edilib.