ABŞ-nin Kaliforniya ştatının Mountain View şəhərində 8 Noyabr – Zəfər Gününə və 9 Noyabr – Dövlət Bayrağı Gününə həsr olunmuş tədbir keçirilib.

Tədbir Azərbaycanın Dövlət Himninin səsləndirilməsi və şəhidlərimizin əziz xatirəsinin bir dəqiqəlik sükutla yad olunması ilə başlayıb.

Şimali Kaliforniya Azərbaycan Mədəniyyət Cəmiyyətinin təşkilatçılığı ilə keçirilən tədbirdə cəmiyyətin prezidenti Sevi Boisvert iştirakçıları salamlayıb, 8 Noyabr – Zəfər Gününün Azərbaycan tarixindəki önəmindən bəhs edib.

Həmçinin təşkilatın gələcək planlarından bəhs olunub, iştirakçılara Azərbaycan dili, nağara və milli rəqs dərsləri barədə məlumat verilib.

Tədbir çərçivəsində uşaqlar və gənclər arasında mini voleybol turniri təşkil edilib.

Cəmiyyətin nəzdində fəaliyyət göstərən “Azərbaycan” rəqs ansamblının üzvləri milli rəqslərimizi nümayiş edib.

Tədbir zamanı Azərbaycan musiqi alətləri, xalçaları və digər milli atributlar xarici və yerli cəmiyyət üzvlərində böyük maraq doğurub.

Qeyd edək ki, Şimali Kaliforniya Azərbaycan Mədəniyyət Cəmiyyəti 43 ildən çoxdur ki, ABŞ-də qeyri-kommersiya təşkilatı olaraq fəaliyyət göstərir. Cəmiyyətin əsas məqsədi Azərbaycan mədəniyyətini, tarixini və dəyərlərini təbliğ etmək, yerli və xarici icmalar arasında dostluq körpüləri qurmaqdır. Təşkilat müxtəlif mədəni tədbirlər, dərslər və festivallar təşkil etməklə Azərbaycan irsinin gələcək nəsillərə ötürülməsinə töhfə verir.