Çexiyanın paytaxtı Praqa şəhərindəki Azərbaycan Mədəniyyət Evində (Azərbaycan Evi) İsrailin ictimai xadimi, “Azİz” İsrail-Azərbaycan Beynəlxalq Assosiasiyasının üçüncü prezidenti Lev Spivakla görüş keçirilib. Görüşdə Lev Spivak “Azİz”-in çoxillik genişmiqyaslı fəaliyyəti haqqında məlumat verib.

Lev Spivak görüş zamanı Dövlət Diasporla İş üzrə Komitənin dəstəyi ilə son iki ildə nəşr edilmiş üç kitabının təqdimatı da baş tutub.

“Öndə gedən”, “Azərbaycanda yəhudiliyin çiçəklənmə dövrü (1969-1982)” və ivrit dilində Nizami Gəncəvinin üçcildlik poeziya toplusu Azərbaycan Evinin kitabxanasına hədiyyə edilib.

“Öndə gedən” kitabı Azərbaycan xalqının Ümummilli Lideri Heydər Əliyevin 100 illiyinə həsr olunub və ivrit dilində işıq üzü görüb. “Azərbaycanda yəhudiliyin çiçəklənmə dövrü (1969-1982)” adlı nəşrdə Ulu Öndərin Azərbaycan SSR-nin rəhbəri olduğu dövrdə dövlət strukturlarında və digər sahələrdə mühüm vəzifələr tutmuş yəhudilərin qısa bioqrafiyaları yer alıb. Nizami Gəncəvinin üçcildlik toplusunda isə dahi mütəfəkkir şairin poeziyasının məzmunu ivrit dilində nəsr formasında təqdim olunub.