İsveçdə fəaliyyət göstərən "Qobustan - Azərbaycan Aydınlar Ocağı"nın təşkilatçılığı ilə 20 Yanvar faciəsinin 35-ci ildönümünə həsr olunmuş "Qanlı 20 Yanvar" adlı videokonfrans keçirilib.

“Qobustan-Azərbaycan Aydınlar Ocağı”nın sədri Səadət Kəriminin moderatoru olduğu videokonfransa müxtəlif ölkələrdən 70-ə yaxın iştirakçı qoşulub.

Tədbirin əvvəlində Kahramanmaraş Sütçü İmam Universitetinin (KSÜ) professoru, tarixçi, politoloq Toğrul İsmayıl 20 Yanvar faciəsi barədə geniş məlumat verib.

Konfransda media perspektivindən Əməkdar jurnalist, professor Qulu Məhərrəmli çıxış edib. O, 20 Yanvar faciəsi təkcə hüzn deyil, həm də qürurlu, şərəfli, şanlı tariximiz olduğunu vurğulayıb.

20 Yanvar şəhidinin bacısı Məleykə Muradova çıxışında xalqımızın tarixinə qanla yazılmış həmin günü xatırlayıb, Vətən övladlarının qəhrəmanlığından danışıb.