Moskva Dövlət Linqvistika Universitetində (MDLU) keçirilən, dahi Azərbaycan şairi Məhəmməd Füzulinin 530 illik yubileyinə həsr olunmuş beynəlxalq elmi-praktik konfrans “Moskva Azərbaycanlılarının Milli-Mədəni Muxtariyyəti”nin təşkilatçılığı ilə baş tutub.

İştirakçılar əvvəlcə tematik sərgi ilə tanış olub, dahi şairin həyat və yaradıcılığı haqqında videoçarx izləyib.

Çıxışlardan öncə Azərbaycan Prezidenti İlham Əliyevin doğum günü münasibətilə təbrik səsləndirilib.

MDLU-nun rektoru İrina Kraeva tədbirin təşkilində göstərdikləri dəstəyə görə Azərbaycanın Rusiyadakı Səfirliyinə, Heydər Əliyev Fondunun Rusiya nümayəndəliyinə və MDB İcraiyyə Komitəsinə təşəkkürünü bildirib.

Tədbirdə çıxış edən Moskva Azərbaycanlılarının Milli-Mədəni Muxtariyyətinin sədri Bəxtiyar Həsənov Füzuli yaradıcılığının Azərbaycan xalqının həyatındakı rolu və məğzindən danışıb. Azərbaycan və Rusiya arasında dostluq əlaqələrinin möhkəmlənməsində MDLU-nun aparıcı rolunu vurğulayıb. Çıxışının sonunda MDLU-nun fəxri professoru, universitetdə fəaliyyət göstərən Azərbaycan Dili və Mədəniyyəti Mərkəzinin ilk rəhbəri Bella Musayevaya Moskva azərbaycanlıları adından təşəkkürnamə təqdim edib.

Rusiya Təhsil Akademiyasının müxbir üzvü, sosiologiya elmləri doktoru Vaqif Bayramov çıxışında bu cür yüksək səviyyəli konfransların ölkələrin qarşılıqlı əlaqələrinin dərinləşməsinə kömək etdiyini söyləyib.

Moskva Dövlət Beynəlxalq Münasibətlər Universitetinin (MQİMO) professoru Abuzər Bağırov, Bakı Slavyan Universitetinin professoru Bella Musayeva, fəlsəfə elmləri doktoru, professor Taimuraz Karayev, MDLU-nun Beynəlxalq Münasibətlər İnstitutunun direktoru Dmitri Belyakov və başqaları Məhəmməd Füzuli yaradıcılığı haqqında məruzələrlə çıxış ediblər.

Sonda Moskva Dövlət Linqvistika Universitetinin tərcümə fakültəsinin II kurs tələbələrinin ifasında Məhəmməd Füzulinin qəzəl və rübailəri səsləndirilib.