Diasporla İş üzrə Dövlət Komitəsinin, Azərbaycan Diasporuna Dəstək Fondunun əməkdaşları və xarici ölkələrdə fəaliyyət göstərən diaspor təşkilatlarının üzvləri üçün “Korrupsiya qarşı mübarizənin gücləndirilməsi” mövzusunda videokonfrans keçirilib.

Onlayn tədbirdə çıxış edən “Konstitusiya” Araşdırmaları Fondunun prezidenti Əliməmməd Nuriyev diaspor təşkilatlarının şəffaflığın təmin olunması sahəsində fəaliyyətini yüksək qiymətləndirib və bu sahədə həyata keçirilən çoxsaylı layihələr haqqında fikirlərini bölüşüb. O, korrupsiyaya qarşı mübarizədə dövlət orqanları (qurumları), özəl sektor və vətəndaş cəmiyyəti institutları arasında əməkdaşlığın daha da gücləndirilməsi və birgə layihələrin həyata keçirilməsinin vacibliyini qeyd edib. Korrupsiyaya qarşı mübarizə sahəsində görülən işlərin statistikasını görüş iştirakçılarının diqqətinə çatdırıb.

Yaponiyada doktorantura təhsili alan Ləman Tarverdiyeva, İsveçdə yaşayan soydaşımız, kinorejissor Rahim Sadıqbəyli yaşadıqları ölkələrdə korrupsiyaya qarşı mübarizə sahəsinə dair müşahidələrini, mövzu ilə bağlı fikirlərini bölüşüblər.

Çıxışlarda korrupsiya ilə mübarizə sahəsində dövlət başçısı İlham Əliyevin verdiyi tapşırıqlar, imzaladığı sərəncamlar vurğulanıb. Komitə ilə diaspor təşkilatları arasında korrupsiyaya qarşı mübarizə sahəsində aparılan təbliğat işləri müzakirə olunub. Komitə və diaspor təşkilatlarının vətəndaş cəmiyyəti institutları ilə əməkdaşlığının bundan sonra da uğurla davam edəcəyi bildirilib.