Şotlandiyanın Qlazqo Universitetində keçirilən “Açıq qapı” günündə həmin təhsil ocağının nəzdində fəaliyyət göstərən Azərbaycan Tələbə Cəmiyyətinin rəhbəri Samirə Həsənzadənin təşəbbüsü ilə Azərbaycan təmsil olunub.

Tədbirdə ölkəmizi Qlazqo Universitetində Dövlət Proqramı çərçivəsində doktorantura pilləsi üzrə təhsil alan və universitetin nəzdində fəaliyyət göstərən cəmiyyətin üzvləri, universitetin azərbaycanlı tələbələri və Şotlandiyada yaşayan soydaşlarımız təmsil ediblər.

“Açıq qapı” günündə Azərbaycanın zəngin mədəniyyətini və milli adət-ənənələrini əks etdirən guşə yaradılıb. Azərbaycan guşəsini ziyarət edən qonaqlara ölkəmiz haqqında məlumatlandırılıb.

Cəmiyyətin üzvləri tərəfindən tədbir iştirakçıları arasında  əyləncəli oyunlar təşkil edilib. Azərbaycana aid sualları doğru cavablandıran iştirakçılara kiçik hədiyyələr verilib.