Rusiya Federasiyasının müxtəlif şəhərlərində yaşayan Azərbaycan icmasının 8 Noyabr – Zəfər Gününə həsr olunmuş tədbirləri keçirilib.

Dağıstan Respublikasında fəaliyət göstərən “Mahaçqala Azərbaycanlıları Milli Mədəni Muxtariyyəti”nin təşkilatçılığı ilə Mahaçqala şəhərində yaşayan soydaşlarımız bir araya gəliblər. Tədbirdə çıxış edən “Mahaçqala Azərbaycanlıları Milli Mədəni Muxtariyyəti”nin sədri Rakif Əzizov və başqaları Zəfər Günü və Azərbaycanın ərazi bütövlüyünün tam bərpası münasibətilə xalqımızı təbrik ediblər.

Nalçik şəhərində keçirilmiş tədbirdə çıxış edən  “Azəri” Milli-Mədəniyyət Mərkəzinin sədri Əli Dadaşov xalqımızın düşmən üzərində qazandığı parlaq qələbədən danışıb. Qeyd edib ki, bu zəfər Azərbaycan xalqının güclü istəyi, Azərbaycan əsgərinin mübarizliyi, Prezident İlham Əliyevin uzaqgörən və qətiyyətli siyasəti nəticəsində əldə olunub.

Qaraçay-Çərkəz Respublikasında fəaliyyət göstərən “Odlar Yurdu” ictimai təşkilatı tərəfindən təşkil olunmuş tədbirdə xalqımızı təbrik edən soydaşlarımız 35 il ərzində davam edən münaqişənin ədalətli həlli, Azərbaycanın ərazi bütövlüyünün və suverenliyinin Qarabağ üzərində tam bərpa olunması münasibətilə xalqımızı təbrik ediblər.

Kislovodsk şəhərində keçirilmiş tədbirdə “Araz” Azərbaycan Milli-Mədəni Muxtariyyətinin sədri Asif Musayev və digər soydaşlarımız çıxış edərək, Qarabağda müharibənin başa çatması və Zəfər Günü münasibətilə xalqımızı təbrik ediblər. “Öz tarixi Vətənimiz və xalqımız üçün qürur duyuruq”, - deyə soydaşlarımız vurğulayıblar.

Xabarovsk şəhərində baş tutan tədbirdə “Xabarovsk diyarı Azərbaycanlılar Birliyi” İctimai Təşkilatının sədri Məmməd İsgəndərov və başqaları çıxış edərək xalqımızı böyük qələbə münasibətilə təbrik edib, Azərbaycan Prezidentinə və ordumuza minnətdarlıqlarını bildiriblər. Qeyd edilib ki, Azərbaycan dövləti və xalqı ölkəmizin ərazi bütövlüyü məsələsində barışmaz olduğunu, dövlət maraqlarını müdafiə etdyini bütün dünyaya sübut etdi.

“Azərbaycan cəmiyyəti Ali Baş Komandan İlham Əliyevin ətrafında birləşərək möhkəmləndi. Azərbaycan ədaləti, öz suverenliyini bərpa etdi və xalqımız öz doğma torpaqlarına ayaq basdı. Bu, tarixi gündür, ədalətin və qanunların aliliyinin təntənəsidir! Hər birimiz bu günü hər zaman xatırlayacağıq”, - deyə soydaşlarımız vurğulayıblar.

Murmansk şəhərində təşkil edilən tədbirdə soydaşlarımız və müxtəlif icmaların nümayəndələri iştirak ediblər. Tədbirdə çıxış edən Murmansk vilayəti “Azərbaycan Mədəniyyət Mərkəzi” İctimai Təşkilatının sədri Afil Hüseynov və sədr müavini Mehdi Fəyyazlı möhtəşəm tarixi hadisə münasibətilə xalqımıza təbrik sözlərini və xoş arzularını ünvanlayıblar: “Azərbaycanın tarixi 8 Noyabr 2020-ci ildə yenidən yazıldı və biz qələbə qazandıq! Bu möhtəşəm gün münasibətilə xalqımızı təbrik edirik”.

Vladivostok şəhərində təşkil edilən tədbirdə çıxış edən Primorsk diyarı “Dostluq” Azərbaycan diasporunun sədri Ramiz Zeynalov deyib ki, müharibə günlərində birlik və həmrəylik nümayiş etdirən xalqımızın Qarabağla bağlı ümdə arzusu Zəfər Gününün üçüncü ildönümü ərəfəsində gerçəyə çevrilib.

Qeyd edək ki, bütün tədbirlərdə ölkəmizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.