Macarıstan Azərbaycan Evinin təşkilatçılığı ilə həmin ölkənin Gödöllö şəhərində milli mədəniyyətimiz və turizmimiz haqqında təqdimat və konsert proqramı keçirilib.

Tədbirdə ölkəmizin mədəni irsi, milli mətbəxi və turizm imkanları haqqında geniş məlumat verilib. Sonra türkdilli ölkələrin nümayəndələrindən ibarət “Turkic Youth Ensemble” qrupu konsert proqramı ilə çıxış edib.

Qrup Azərbaycan və macar musiqisinin ən gözəl nümunələrini təqdim etməklə yanaşı, digər türkdilli ölkələrin milli mahnılarına da yer verib. Təqdimat və konsert proqramı böyük maraq və rəğbətlə qarşılanıb.

Qeyd edək ki, Budapeştdə fəaliyyət göstərən Macarıstan Azərbaycan Evi 27 dekabr 2019-cu ildə açılıb. Bu gün 19 xarici ölkədə 30 Azərbaycan Evi fəaliyyət göstərir və onlar ölkəmizin dünyada tanıdılmasında, eləcə də diasporumuzun əlaqələrinin möhkəmlənməsində mühüm rol oynayır.