Qazaxıstanın Ş.Yessenov adına Xəzər Texnologiya və Mühəndislik Universitetinin Azərbaycan Mərkəzində 1918-ci il mart soyqırımına həsr olunan açıq dərs keçirilib.

Öncə soyqırımı qurbanlarının xatirəsi bir dəqiqəlik sükutla yad edilib.

Azərbaycan Mərkəzinin direktoru, “Beynəlxalq münasibətlər və turizm” kafedrasının baş müəllimi İlkin Orucov giriş nitqində soyqırımından əvvəlki hadisələrin tarixi kontekstini, miqyasını və Azərbaycan xalqı üçün nəticələrini ətraflı izah edib. "Biz bu gün burada 1918-ci ilin martında baş vermiş faciəli hadisələri, minlərlə günahsız insanın qəddarlıq və zorakılıq qurbanı olduğunu xatırlamaq üçün toplaşmışıq. Bu hadisələri unutmamaq vacibdir ki, bir daha təkrarlanmasın. Biz xalqlar arasında sülhə, tolerantlığa və qarşılıqlı anlaşmaya çalışmalıyıq",- deyə mərkəzin direktoru bildirib.  

Tələbələr açıq dərsdə fəal iştirak edərək tarixi yaddaşın qorunmasının vacibliyi barədə fikirlərini bölüşüblər. Müzakirə tələbələrin tarixə olan dərin marağını, humanizm və insan hüquqlarına hörmətlə yanaşma prinsiplərinə əsaslanan dünya qurmaq istəklərini nümayiş etdirib.

Tədbirin sonunda arxiv materiallarının, fotoşəkillərin və şahid ifadələrinin yer aldığı sənədli film nümayiş olunub.

Qeyd edək ki, bu cür tədbirlərin keçirilməsi təkcə tarixi yaddaşın qorunmasına deyil, həm də gənc nəsildə sülh, tolerantlıq və mədəniyyətlərarası dialoq dəyərlərinin formalaşmasına kömək edir.