Kanadanın Monreal şəhərində fəaliyyət göstərən “Bienvenue à Notre-Dame-De-Grace” (NDG-yə xoş gəlmisiniz) təşkilatı “Yeni qonşular üçün xoş gəldiniz” (“Fête de bienvenue aux nouveaux voisins”) adlı tədbir keçirib.

Tədbirdə Monreal-Kanada Azərbaycan Cəmiyyəti ölkəmizi təmsil edib. Festivalda Azərbaycanın milli adət-ənənələrini əks etdirən guşə yaradılıb. Cəmiyyətin gənc və fəal üzvlərindən olan Leyla Kohnavard, Nilufər Kohnavard, eyni zamanda V Yay Düşərgəsinin iştirakçısı Türkan Bozkurt ziyarətçilərə Azərbaycanın tarixi, mədəniyyəti, milli mətbəxi, xüsusilə Qarabağ haqqında geniş məlumat verib. Azərbaycan guşəsi tədbir iştirakçılarının və ziyarətçilərin marağına səbəb olub.

Tədbirin sonunda təşkilatçılar Monreal-Kanada Azərbaycan Cəmiyyətinin festivaldakı iştirakını yüksək qiymətləndirib və təşəkkürünü bildirib.