Rusiya Federasiyasının Kabarda Balkar Respublikasının Mədəniyyət Fondunda “Azəri" Azərbaycan Milli-Mədəniyyət Mərkəzinin təşkilatçılığı ilə SSRİ Xalq artisti Rəşid Behbudovun xatirəsinə həsr olunmuş təntənəli tədbir keçirilib.

Tədbirə Kabarda Balkar Respublikası Milli Məsələlər və İctimai Layihələr Nazirliyinin və ictimaiyyətin nümayəndələri, yerli diaspor təşkilatlarının sədrləri, Azərbaycan diasporunun fəalları qatılıb.

“Azəri" Azərbaycan Milli-Mədəniyyət Mərkəzinin sədri, professor Əli Dadaşov və digər diaspor təşkilatlarının sədrləri çıxışlarında vokal sənətinin görkəmli nümayəndəsi Rəşid Behbudovun həm sovet, həm də Azərbaycan mədəniyyətinin inkişafına verdiyi böyük töhfələrdən danışıb.

Daha sonra Rəşid Behbudovun həyat və yaradıcılığına həsr olunmuş film göstərilib.

Tədbirdə Azərbaycan diasporunun gənc nümayəndələri şeirlər səsləndirib, "Uzundərə" və "Sarı Gəlin" rəqslərini nümayiş etdirib.

Sonda Azərbaycan diasporunun fəallarına diplomlar və təşəkkürnamələr təqdim olunub.