İsveçrənin Bazel şəhərində fəaliyyət göstərən “Azərbaycanın Dostları” Birliyi Bern Bələdiyyəsi tərəfindən təşkil olunan Muzeylər Gecəsi və Bern Mədəniyyət Festivalında ölkəmizi vizual incəsənət və rəqs sahələrində uğurla təmsil edib.

Muzeylər Gecəsi çərçivəsində azərbaycanlı fotoqraf Andre Jabalının Azərbaycan mədəniyyətinə və dünyanın müxtəlif ölkələrinə aid fotoşəkilləri nümayiş etdirilib. Fotoqrafın bənzərsiz üslubunu və çəkdiyi kadrların dərin mənasını qonaqlar yüksək qiymətləndirib.

Festivalda Azərbaycanı rəqs nominasiyasında “Ritm” qrupu təmsil edib. Qrupun ifasında Azərbaycan xalq rəqsləri özünəməxsus dinamika, incəlik və coşqu ilə təqdim olunub və böyük maraqla izlənilib.

Münsiflər heyəti rəqqaslarımızın dəqiqliyini və milli üslubunu yüksək qiymətləndirərək, onları birinci yerə layiq görüb. Bu nəticə Azərbaycan mədəniyyətinin və ənənəvi rəqs sənətinin beynəlxalq səviyyədə necə yüksək qiymətləndirildiyinin daha bir sübutudur.

“Azərbaycanın Dostları” Birliyi bu cür tədbirlərdə iştirak üçün göstərilən dəstəyə görə, Diasporla İş üzrə Dövlət Komitəsinə minnətdarlıq edib.