“Qobustan” İsveç Aydınlar Ocağının sədri Səadət Kəriminin moderatorluğu ilə “Xaricdə Azərbaycan Milli Musiqisi” adlı onlayn görüş keçirilib.

Görüşdə bəstəkar, sənətşünaslıq üzrə fəlsəfə doktoru, musiqişünas Xədicə Zeynalova, tanınmış orqan ifaçısı Cəmilə Cavadova-Şpitsberq, sənətşünas, Azərbaycan Bəstəkarlar İttifaqının üzvü Aydın Ziyadlı, musiqiçi soydaşlarımız Aynur Məlikova, Hüseyn Nəsirli, İradə Sultanova, Leyli Yekta, Sevda Murad, Qalib Məmmədov və Osloda fəaliyyət göstərən Nizami Gəncəvi adına Həftəsonu Azərbaycan məktəbinin müəllimi Arzu Rzayeva iştirak edib.

Onlayn görüşdə musiqiçilərimizin Vətəndən kənarda Azərbaycan musiqisinin və mədəniyyətinin, xalqımızın zəngin mədəni irsinin təbliği sahəsindəki xidmətlərindən bəhs edilib. Azərbaycan diasporunun gördüyü işlər nəticəsində görkəmli mədəniyyət xadimlərimizin adlarının artıq dünyanın əksər ölkələrində tanınması təqdirəlayiq hal kimi qiymətləndirilib.