Şotlandiyanın Aberdin Universitetinə yeni qəbul olan tələbələrin tədris prosesinə uyğunlaşması üçün Aberdin Azərbaycan Cəmiyyətinin təşkilatçılığı ilə orientasiya günü keçirilib. Tədbirin təşkilatçısı, cəmiyyətin sədri İbrahim Xasiyev yeni gələn tələbələri salamlayaraq Şotlandiyada yaşayan azərbaycanlıların həyatından, onların cəmiyyətə inteqrasiyasından danışıb, Aberdin Azərbaycan Cəmiyyətinin həyata keçirdiyi müxtəlif layihələr barədə geniş məlumat verib. O, həmçinin Aberdin Universitetində təhsil almağın üstünlüklərindən, tələbələri maraqlandıran mövzulardan bəhs edib.

Orientasiya günü tələbələr üçün həm universitet həyatına uyğunlaşmaq, həm də Azərbaycan icması ilə yaxından tanışlıq baxımından faydalı və yaddaqalan olub. Görüşdə  tələbələrin müxtəlif mövzularda sualları cavablandırılıb.