Diasporla İş üzrə Dövlət Komitəsinin sədri Fuad Muradov üçüncü “Yüksəliş” müsabiqəsinin qalibi Mirzə Ələkbər Babayevlə onlayn görüş keçirib.

Komitə sədri müsabiqənin mentorluq proqramını uğurla başa vurması münasibətilə qalibi təbrik edib və ona gələcək fəaliyyətində uğurlar arzulayıb. Görüş zamanı gələcəkdə komitə ilə əməkdaşlığın davam etdirilməsi vurğulanıb, mentorluq proqramı çərçivəsində əldə olunmuş nəticələr barədə fikir mübadiləsi aparılıb.

Müsabiqənin qalibi Mirzə Ələkbər Babayev öz növbəsində mentorluq proqramı müddətində ona göstərilən dəstəyə görə minnətdarlığını bildirib, qazandığı bilik və təcrübənin faydalı olmasından məmnunluğunu ifadə edib.

Xatırladaq ki, “Yüksəliş” müsabiqəsi Prezident İlham Əliyevin 2019-cu il 26 iyul tarixli Sərəncamına əsasən təsis olunub. Müsabiqə intellektual səviyyəsi və idarəçilik keyfiyyətləri yüksək olan perspektiv rəhbər şəxslərin müəyyən edilməsi, dəstəklənməsi və ölkədə kadr ehtiyatı bankının yaradılması məqsədi daşıyır.