Hazırkı mürəkkəb beynəlxalq reallıqlar müstəvisində Azərbaycan diasporu mühüm strateji alətə çevrilir. Bu, sadəcə olaraq vətənindən kənarda yaşayan bir qrup vətəndaş və ya mühacir deyil, dünya siyasətinə təsir edən, beynəlxalq diplomatiyada vacib rol oynayan güclü amildir. Sözügedən fenomeni qlobal proseslərə əhəmiyyətli təsir göstərən “yumşaq güc”ün təzahürü adlandırmaq olar.

Bu barədə İsrailin sabiq rabitə, peyk və kibertəhlükəzislik naziri, tanınmış siyasətçi və politoloq Ayub Kara beynəlxalq yəhudi mediasının nəhəngi, ABŞ-da yayımlanan “Jewish News Syndicate” nəşrində dərc olunmuş “Diasporların əhəmiyyəti” başlıqlı məqaləsində yazıb.

Məqalədə dünyadakı Azərbaycan diaspor təşkilatlarının birləşməsi prosesinin Azərbaycan xalqının Ümummilli Lideri Heydər Əliyevin prezidentliyi dövründə başladığı və onun siyasətinin layiqli davamçısı Prezident İlham Əliyevin xaricdəki soydaşlarla əlaqələri dəstəklədiyi qeyd olunub. Azərbaycan rəhbərliyinin xarici siyasətdə uğurun əsas amillərindən biri kimi diasporun inkişafını və onun yaşadığı cəmiyyətlərlə əlaqələrinin gücləndirilməsini gördüyü diqqətə çatdırılıb.

Digər etnik qruplarla əməkdaşlığı inkişaf etdirməyin və bu əlaqələrdən diasporun mənşə ölkələrinə beynəlxalq dəstəyi gücləndirmək üçün istifadənin vacibliyi qeyd olunan məqalədə sözügedən yanaşmanın bariz nümunəsi kimi İsraildəki Azərbaycan diasporu və Azərbaycandakı yəhudi icması arasında həmrəylik və çoxşaxəli əməkdaşlıq önə çəkilib. Sabiq nazir 2022-ci ilin iyununda Diasporla İş üzrə Dövlət Komitəsinin sədri Fuad Muradovun İsrailə səfərini Bakının diasporla əlaqələrinin gücləndirilməsi istiqamətində göstərdiyi səylərin parlaq nümunəsi kimi səciyyələndirib. Səfər çərçivəsində Komitə sədrinin İsrail hökumətinin və İsraildəki Azərbaycan icmasının nümayəndələri ilə görüşlərinin iki ölkə arasında əlaqələrin inkişafına mühüm töhfə olduğuna diqqət çəkilib. Müəllif sözügedən səfəri Azərbaycan dövlətinin diasporla əlaqələrinin möhkəmləndirilməsi istiqamətində həyata keçirdiyi sistemli işin uğurlu nümunəsi kimi xarakterizə edib.

Tanınmış siyasətçinin fikrinə görə, Fuad Muradov və İsrailin diaspor məsələləri üzrə naziri Amiçai Şiklinin rəhbərlik etdiyi qurumlar arasında əməkdaşlığın davamlı şəkildə inkişafı dünyadakı Azərbaycan və yəhudi diasporları arasında əlaqələri xeyli gücləndirə bilər. O, sözügedən icmalar arasında müntəzəm qarşılıqlı əlaqələrin dəstəklənməsinin qlobal miqyasda azərbaycanlıların və yəhudilərin bir-birlərinin səfiri kimi çıxışlarına kömək göstərəcəyinə inamını ifadə edib. “Şübhəsiz ki, Azərbaycan diasporunun dəstəklənməsi, onun digər beynəlxalq qurumlarla əlaqələrinin inkişafı ölkənin siyasi və diplomatik mövqelərinin möhkəmlənməsinə kömək edəcəkdir. Bu, təkcə Bakıya deyil, eyni zamanda Azərbaycan kimi mütərəqqi ölkənin güclənməsini dəstəkləyəcək Təl-Əvivə də fayda verəcək”, - israilli sabiq nazir əlavə edib.

Məqaləni ətraflı şəkildə aşağıdakı linkdən oxumaq mümkündür:

https://www.jns.org/the-importance-of-diasporas/