14 yanvar – Gürcüstanın Dövlət Bayrağı Günü münasibətilə Bolnisi rayonunda fəaliyyət göstərən “Qafqaz Hüquq və İnteqrasiya Mərkəzi”nin bir qrup üzvü Bolnisi Mədəniyyət və İstirahət parkında "Bayraq bizi birləşdirir" adlı məlumatlandırıcı görüş keçirib.

Müdavimlər Gürcüstanın müasir bayrağının tarixi, rəmzlərinin mənaları, eyni zamanda Dövlət atributlarına qarşı davranış qaydaları haqqında geniş məlumat veriblər.

Qeyd edək ki, Gürcüstanın hazırkı dövlət bayrağı 2004-cü ildə qəbul edilib və “Beş Xaçlı Bayraq” kimi tanınır. Bayrağın ağ fonu sülhü və təmizliyi, qırmızı rəng isə güc və qətiyyəti ifadə edir. Bayraq üzərindəki böyük qırmızı xaç və dörd kiçik xaç Gürcüstanın xristian dininə bağlılığını, dini ənənələrini və ölkənin tarixi keçmişini göstərir.