Almaniyanın Münster, Maqdeburq, Berlin şəhərlərində 20 Yanvar faciəsinin 35-ci ildönümünə həsr olunmuş anım tədbirləri keçirilib.

Hər üç şəhərdə keçirilən tədbirlər Azərbaycanın Dövlət Himninin səsləndirilməsi, 20 Yanvar şəhidlərinin, həmçinin Azərbaycanın ərazi bütövlüyü uğrunda canlarını fəda etmiş şəhidlərimizin əziz xatirəsinin yad olunması ilə başlayıb.

Münster şəhərindəki anım tədbiri Avropa Azərbaycan Mərkəzinin təşkilatçılığı, Almaniya-Azərbaycan Kültür Evinin iştirakı ilə baş tutub. Tədbirin aparıcısı, həftəsonu məktəbinin müəllimi dr. Sahibə Payıküçük iştirakçıları salamlayaraq, bu günün mahiyyəti barədə məlumat verib. Tədbirdə Avropa Azərbaycan Mərkəzinin sədri Zaur Əliyev, Avropa Azərbaycan Mərkəzinin sədr müavini Sərdar Əliyev, Münsterdəki Almaniya-Azərbaycan Kültür Evinin sədri Eldar Güneyli, Almaniya-Azərbaycan Kültür Evinin sədr müavini Nəcəfova Səbinə, Beynəlxalq İşçi Qrupunun sədri dr. Lütfi Yavuz və başqaları çıxış edib. Çıxışlarda Azərbaycan xalqının mübarizə ruhundan danışılıb, şəhidlərimizin xatirəsinə dərin ehtiram ifadə olunub. Diasporla İş üzrə Dövlət Komitəsinin dəstəyi ilə fəaliyyət göstərən həftəsonu məktəbinin şagirdləri "Şəhidlər" şeirini səsləndirib.

Maqdeburq şəhərində fəaliyyət göstərən Azərbaycan Evində 20 Yanvar faciəsinə həsr olunmuş guşə yaradılıb, anım tədbiri keçirilib. Almaniya Azərbaycanlıları Alyansının İdarə Heyətinin üzvü, Heydər Əliyev adına Boks Komitəsi və Diaspor Boks Liqasının rəhbəri Yaşar Niftəliyev çıxış edərək, 20 Yanvarın ölkəmizin azadlıq, müstəqillik mübarizəsinin şərəfli səhifəsi olduğunu bildirib.

Almaniyanın Berlin şəhərində fəaliyyət göstərən Xarı-Bülbül Mədəniyyət Evində 20 Yanvar hadisələrinin 35-ci ildönümünə həsr olunmuş xüsusi dərslər təşkil olunub. Dərs zamanı 20 Yanvar hadisələrinə dair video çarx göstərilib. Şagirdlərə həmin günün azadlıq mübarizəsində oynadığı mühüm rol, qəhrəmanlarımızın göstərdiyi şücaət və Azərbaycan xalqının dönməz iradəsi haqqında məlumat verilib.