ABŞ-də Azərbaycan diasporunun təşəkkülündə xüsusi əməyi olan, Azərbaycan Nyu-York Assosiasiyasının həmtəsisçisi, Qadınlar Şurasının rəhbəri Solmaz Əlizadə-Kollaçinin anım tədbiri keçirilib. Azərbaycan Nyu-York Assosiasiyasının təşkilatçılığı ilə keçirilən tədbirdə icma üzvləri Solmaz Əlizadə-Kollaçi ilə bağlı xatirələrini bölüşüb, onun Vətən üçün gördüyü işlərdən danışıblar.

O, ABŞ-yə köç edən ilk azərbaycanlı ailələrdən birinin övladı, AXC-nin Əksinqilabla Mübarizə Təşkilatının rəisi Nağı bəy Şeyxzamanlının gəlini olub. ABŞ-də yaşayan Azərbaycan icmasının birliyi, ölkəmizin  tanıdılması və Qarabağ həqiqətlərinin Amerika ictimaiyyətinə çatdırılması istiqamətində mühüm xidmətlər göstərib. Evinin qapısı icma üzvlərinin üzünə hər zaman açıq olan Solmaz xanımı Nyu-Yorkdakı soydaşlarımız “Azərbaycan icmasının anası” adlandırıb.

Qarabağın azadlığa qovuşduğunu görmək Solmaz xanımın ən böyük arzusu idi.  2022-ci ilin aprelində Şuşada keçirilmiş Dünya Azərbaycanlılarının V (Zəfər) Qurultayında iştirak edərək arzusuna çatıb. 2022-ci ildə diaspor quruculuğuna töhfələrinə görə “Diaspor fəaliyyətində xidmətlərə görə" Azərbaycan Respublikasının medalı ilə təltif olunub.