Türkiyə-Azərbaycan Dərnəkləri Federasiyasının (TADEF) və Manisa Azərbaycan Kültür və Həmrəylik Dərnəyinin birgə təşkilatçılığı ilə 8 Noyabr – Zəfər Gününə həsr olunmuş “Salam Türkün bayrağına” adlı tədbir təşkil olunub.

Tədbir Manisada yerləşən Yunus Əmrə Mədəniyyət Parkındakı “İrfan Məclisi”ndə təşkil edilib. Azərbaycanın və Türkiyənin şəhidlərinin əziz xatirəsi 1 dəqiqəlik sükutla yad edilib, iki ölkənin dövlət himnləri səsləndirilib.

Tədbiri açıq elan edən Manisa Azərbaycan Kültür və Həmrəylik Dərnəyinin sədri Şentürk Hoşgül Zəfər Gününə həsr olunmuş tədbirdə iştirakına və dəstəyini əsirgəmədiyinə görə Yunus Əmrə Bələdiyyəsinin sədri Semih Balabana, Manisa Büyükşəhər Bələdiyyəsinin Baş katibi Burak Dəstəyə və Manisanın digər bələdiyyələrinə, yerli icra strukturlarına, ictimai təsisatlarına, siyasi partiyalarına və media nümayəndələrinə minnətdarlığını bildirib.

Tədbirə dəvət olunan Ege Universitetinin Türk Dünyası Araşdırmaları İnstitutunun Türk Dünyası İctimai, iqtisadi və siyasi əlaqələr kafedrasının müdiri, professor Vəfa Kurban Ermənistan tərəfindən Azərbaycana qarşı həyata keçirilən işğalçılıq siyasəti, etnik təmizləmə, separatçılıq və terror siyasəti barədə məruzə ilə çıxış edib. Hazırladığı təqdimatda törədilən cinayətləri faktlarla nümayiş etdirən məruzəçi qlobal arenada nümayiş olunan ikili standartlardan və onun ağır nəticələrindən danışıb. Qarabağın işğal planı, buna qədərki proseslərin xronologiyası təqdim olunan məruzədə dəfələrlə azərbaycanlılara qarşı törədilmiş soyqırımların işğaldan azad olunan həmin ərazilərdə kütləvi məzarlıqların tapılması ilə sübuta yetirildiyi vurğulanıb.

Zəfər Günü barəsində danışan alim Azərbaycan xalqının əzmi və iradəsi, iqtisadi gücü, müasir ordu quruculuğu və xalq-iqtidar birliyi nəticəsində ölkəmizin qələbəsinin təmin olunduğunu diqqətə çatdırıb. Qeyd olunub ki, Azərbaycan Respublikasının Prezidenti, müzəffər Ali Baş Komandan İlham Əliyevin böyük bacarıq və qətiyyəti, yüksək peşəkarlıq nümayiş etdirən hərbçilərimizin qəhrəmanlığı ilə Vətən müharibəsi xalqımızın böyük zəfəri ilə başa çatıb.

Daha sonra tədbir bədii hissə ilə davam edib.