“Azərbaycan və türk diaspor təşkilatlarının birgə fəaliyyət istiqaməti” mövzusunda vebinar keçirilib

Diasporla İş üzrə Dövlət Komitəsinin təşəbbüsü, Xaricdə Yaşayan Türklər və Əqraba İcmaları İdarəsi (YTB) və Diasporla İş üzrə Dövlət Komitəsinin birgə təşkilatçılığı ilə “Azərbaycan və Türk diaspor təşkilatlarının birgə fəaliyyət istiqaməti” mövzusunda vebinar keçirilib. Vebinarda Diasporla İş üzrə Dövlət Komitəsi sədrinin birinci müavini Valeh Hacıyev və YTB sədrinin müavini Said Yusif çıxış ediblər. Görüşdə Azərbaycan və Türk diaspor təşkilatlarının həm qlobal, həm də regional müstəvidə birgə fəaliyyət mexanizmləri, mövcud problemlər, habelə beynəlxalq çağırışlara uyğun olaraq, cari və gələcək əməkdaşlıq perspektivləri barədə müzakirə aparılıb. V.Hacıyev YTB ilə faydalı əməkdaşlıq məsələsinə toxunaraq bildirib ki, iki ölkənin diaspor qurumu arasında imzalanan anlaşma memorandumu, eləcə də Berlin və Nyu-York şəhərlərində keçirilən təcrübə proqramları böyük əhəmiyyət kəsb edir. O, həmçinin 44 günlük Vətən müharibəsi dövründə YTB sədrinin Azərbaycana səfəri çərçivəsində mülki əhalinin hədəfə alındığı Gəncə şəhərində terror qurbanlarını yad etməsini iki ölkə arasında dostluq və qardaşlığın bariz nümunəsi kimi qiymətləndirib, birgə fəaliyyətin bu gün də uğurla davam etdiyini bildirib.
Vebinar iştirakçılarını salamlayan Said Yusif türk diaspor təşkilatlarının uğurlu siyasətinin təkcə dövlət dəstəyi hesabına yox, həm də diaspor təşkilatları arasındakı sıx dostluq və əməkdaşlıq bağları sayəsində mümkün olduğunu bildirib. O, diaspor təşkilatlarının təmsil olunduqları ölkələrin ictimai-siyasi həyatında yaxından iştirak etməsinin vacibliyini xüsusi vurğulayıb və diaspor nümayəndələrinin aparıcı media orqanlarında təmsil olunmasının əhəmiyyətindən danışıb.