Azərbaycan diasporunun gələcək fəaliyyət istiqamətlərinin və Qarabağda əldə edilən tarixi qələbədən sonra qarşıda duran vəzifələrin virtual müzakirələri davam etdirilir. Bu məqsədlə müxtəlif ölkələrdə yaşayan soydaşlarımızın və diaspor rəhbərlərinin iştirakı ilə videogörüşlər geçirilir.

Növbəti belə görüşlər 11 noyabr 2020-ci il tarixdə İsveç, Niderland–Belçika, 12 noyabr 2020-ci il tarixdə İsveçrə, İtaliya, 13 noyabr 2020-ci il tarixdə İspaniya, 16 noyabr 2020-ci il tarixdə Polşa, 17 noyabr 2020-ci il tarixdə Almaniya, 18 noyabr 2020-ci il tarixdə isə İsraildə yaşayan azərbaycanlıların iştirakı ilə keçirilib.

Diasporla İş üzrə Dövlət Komitəsinin, diaspor təşkilatlarının və ayrı-ayrı soydaşlarımızın təşəbbüsü ilə baş tutan müzakirələrin əsas istiqamətini qələbədən sonrakı dövrdə çevik fəaliyyət mexanizminin formalaşdırılması təşkil edib.

Keçirilən videogörüşlərdə Koordinasiya şuralarının əlaqələndiriciləri, müxtəlif ölkələrdə yaşayan soydaşlarımız, diaspor rəhbərləri və Dövlət Komitəsinin məsul şəxsləri iştirak ediblər.

Görüş iştirakçıları rəşadətli Azərbaycan ordusunun şücaəti, Azərbaycan Prezidenti, Ali Baş Komandan İlham Əliyevin uzaqgörən və müdrik siyasəti, Azərbaycan xalqının sarsılmaz birliyi nəticəsində əldə edilmiş möhtəşəm qələbə münasibətilə bir-birlərini təbrik edib, Azərbaycan diasporunun bundan sonrakı fəaliyyət mexanizmləri barədə müzakirələr aparıblar.

Azərbaycanın milli dəyərlərinin təbliği məqsədi ilə xarici KİV-lə işin daha keyfiyyətli təşkili, xaricdə yaşayan azərbaycanlıların təşkilatlanması, Azərbaycan diasporunun daha da güclənməsi, dövlətimizin milli maraqlarının və mənafeyinin qorunması istiqamətində görüləcək işlərlə bağlı fikir mübadiləsi aparılıb, rəy və təkliflər səsləndirilib.