Diasporla İş üzrə Dövlət Komitəsinin ABŞ-da səfərdə olan nümayəndə heyəti Nyu-Yorkda yaşayan azərbaycanlılarla görüş keçirib. Görüşdə onlarla soydaşımız iştirak edib. Tədbiri giriş sözü ilə Komitənin Aparat rəhbəri D.Rəcəbli açıb və sonra DİDK sədrinin birinci müavini V.Hacıyev Azərbaycan dövlətinin diaspor siyasəti barədə məlumat verib və bu siyasətin reallaşmasında ABŞ-dakı azərbaycan diasporunun böyük rola malık olduğu diqqətə çatdırıb. Eyni zamanda DİDK-nin son dövrlərdə fəaliyyətini əks etdirən videotəqdimat olub və Azərbaycan Diasporuna Dəstək Fondu barədə ətraflı məlumat verilib.

Beynəlxalq siyasətin mərkəz nöqtəsi olan Amerika Birləşmiş Ştatlarında yaşayan azərbaycanlıların ana vətənlə əlaqələrinin möhkəm olmasının əhəmiyyəti barədə danışılıb.

Qeyd olunub ki, son illər burada yaşayan soydaşlarımızın təşkilatlanması yönündə ciddi addımlar atılıb və bu da artıq öz bəhrəsini verir. Onların cəmiyyətə inteqrasiyasının daha da dərinləşdiyi, real və virtual platformalarda birləşmələri sahəsində konkret addımlar atıldığı nəzərə çatdırılıb.

Görüşdə diaspor nümayəndələri ilə geniş fikir mübadiləsi aparılıb, onların təklifləri dinlənilib.

Diqqətə çatdıraq ki, hazırda ABŞ-da on minlərlə azərbaycanlı yaşayır və onların bir qismi 28 diaspor təşkilatında birləşərək uğurlu fəaliyyət göstərirlər.

Daha sonra Azərbaycan Prezidentinin sərəncaml iıə Cümhuriyyətin 100 illiyi medalı ilə təltif olunan Tomris Azəri, Zöhrə Şərifi və Əbülfəz Bahaduriyə medallar təqdim olunub. Təltif olunanlar bu yüksək mükafata görə Azərbaycan dövlətinə və Prezident İlham Əliyevə minnətdarlıqlarını bildiriblər.

Toplantıda İslam Əməkdaşlıq Təşkilatının BMT- dəki daimi müşahidəçisi və səfir Aqşin Mehdiyev və Azərbaycanın ABŞ-dakı səfirliyinin müşaviri Vüqar Qurbanov iştirak edib. A. Mehdiyev görüşün əhəmiyyəti barədə danışıb və davamlı olmasının diaspor fəaliyyətinə müsbət təsir edə biləcəyini qeyd edib.