Skandinaviya ölkələrində yaşayan azərbaycanlılar da birgə fəaliyyət göstərəcək

Diasporla İş üzrə Dövlət Komitəsinin nümayəndə heyətinin Avropa görüşləri İsveçdə davam etdirilib. İsveç Krallığına səfər Azərbaycan Respublikasının Stokholmdakı Səfirliyində Ümummilli lider Heydər Əliyevin büstü önünə gül dəstəsinin qoyulması ilə başlayıb.
Daha sonra İsveç siyasətində uğur qazanmış bir qrup Azərbaycanlı ilə görüş keçirilib. Görüşdə Azərbaycanın İsveçdəki Səfiri Adış Məmmədov, habelə İsveç Sosial-Demokratlar Partiyasının üzvləri, Söderberq Jönköpinq region parlamentinə seçkilərdə qalib gələn siyasətçi İradə Əliyeva, Haninge bələdiyyəsindən əyalət parlamentinə seçilən deputat Vüsal Quliyev və İsveç Mərkəz Partiyasından Partille bələdiyyə məclisinin üzvü seçilən Turan Əliyev də iştirak edib.
Görüş iştirakçılarını salamlayan səfir İsveçdə yaşayan soydaşlarımızın Azərbaycan və azərbaycançılıq naminə gördükləri işlərdən söz açıb.
Azərbaycan diasporunun fəaliyyəti, Diasporla İş üzrə Dövlət Komitəsi tərəfindən gələcəkdə həyata keçirilməsi nəzərdə tutulan layihələr haqqında söz açan Komitə sədri Fuad Muradov isə ölkəmizin Prezident İlham Əliyevin rəhbərliyi altında sürətlə inkişaf etməsi, ümummilli lider Heydər Əliyevin diaspor quruculuğuna verdiyi töhfələri qeyd edib, Azərbaycan dövlətinin xaricdə yaşayan soydaşlarımıza daim diqqət və qayğı göstərdiyini bildirib.
Görüşdə azərbaycançılıq ideyaları ətrafında birləşmək imkanlarından, Dağlıq Qarabağ münaqişəsi və Azərbaycan həqiqətlərinin dünya ictimaiyyətinə çatdırılmasında diaspor təşkilatlarının rolundan danışılıb. Komitə sədri soydaşlarımızın qayğıları ilə maraqlanıb, onların təklif və ideyaları ətrafında maraqlı müzakirələr aparılıb.
İsveç Krallığında görüşlərin növbəti ünvanı isə Nobel muzeyi olub. Nümayəndə heyətini salamlayan direktor Olov Amelin muzeyin fəaliyyəti haqqında ətraflı məlumat verib, rəhbərlik etdiyi muzeyin özəlliklərindən, burada nümayiş olunan eksponatlardan danışıb. Komitə sədri isə, öz növbəsində, Azərbaycan ilə İsveç arasındakı əlaqələrin tarixindən, Nobel qardaşlarının ölkəmizdə fəaliyyətindən söhbət açıb və tarixin bu səhifələrinin daha yaxşı öyrənilməsi zəruriliyini qeyd edib. Görüşdə qarşılıqlı maraq doğuran məsələlər ətrafında fikir mübadiləsi aparılıb. Sonda Dağlıq Qarabağ haqqında kitab Olov Amelinə hədiyyə edilib.
Səfər çərçivəsində nümayəndə heyəti Skandinaviya Azərbaycanlılarının Koordinasiya Şurasının yaradılması ilə əlaqədar keçirilən Təsis konfransında da iştirak edib. Azərbaycanın İsveçdəki səfiri, soydaşlarımız, diaspor təşkilatı rəhbərlərinin iştirak etdiyi konfransda Diasporla İş üzrə Dövlət Komitəsinin fəaliyyəti, bu sahədə həyata keçirilən layihələr barədə məlumat verən Komitə sədri daha güclü əlaqələndirmənin zəruri olduğunu bildirib. Eyni zamanda, soydaşlarımızın və diaspor təşkilatlarının daim ölkə başçısının nəzərində olduğunu və bu istiqamətdə verilən tapşırıqları diqqətə çatdırdı. Konfransda Dövlət Komitəsinin yeni yazılmış himni və fəaliyyətini əks etdirən videoçarxlar tədbir iştirakçılarına nümayiş olunub, habelə qurumun yenilənmiş saytı və sosial şəbəkələrdəki hesabları barədə məlumatlar verilib.
Konfransda İsveç, Norveç, Finlandiya və Danimarkada daha konstruktiv və məqsədyönlü şəkildə fəaliyyətini təmin etmək, diaspor təşkilatlarımızın fəaliyyətinin əlaqələndirilməsi və daha aktiv fəaliyyət göstərməsi məqsədilə İsveçdə Azərbaycanlıların Koordinasiya Şurasının yaradılması haqqında qərar qəbul olunub.
“Finlandiya Azərbaycan-Türk gənclər təşkilatının” sədri Ülviyyə Cabbarova, İsveçdə fəaliyyət göstərən yazıçı, SAF təşkilatının üzvü Eluca Atalı, İsveç Azərbaycanlıları Konqresinin üzvü Sara Eveberger, habelə Norveçdə fəaliyyət göstərən “Can Azərbaycan” təşkilatın rəhbəri Şervin Nəcəfpur Koordinasiya Şurasının əlaqələndiricisi seçilib.